D Landdaagswahl z Vorarlberg am 13. Oktober 2019 isch di 16. Wahl vum Vorarlberger Landdaag syter anne 1945 gsii.[1] Bi däre Wahl, wu nootwändig wooren isch, wel di fimfjeerig Amtsperiod vum 30. Vorarlberger Landdaag anne 2019 abglofen isch, sin sämtligi 36 Abgordnete nei gwehlt woore. Si wehlen im Aaschluss in ihre konschtituierende Sitzig am 6. Novämber 2019 di nei Vorarlberger Landesregierig.[2]
Bi dr Wahl hän noch em vorlaifige Wahlergeebnis (ohni wahlkraisfrämdi Briefwahlstimme) di boode bishäärige Regierigsbarteie ÖVP un Grieni Zuegwinn ghaa. Au d SPÖ un NEOS hän lyychti Stimmezuewächs ghaa. Greeschte Verlierer vu dr Wahl isch d FPÖ, wu mit ihrem neie Spitzekandidat Christof Bitschi iber nyyn Brozäntpinkt verloore het un dr zweet Blatz dodermit an di Griene het mieße abgee. Wider aidytig uf em eerschte Blatz isch d Volksbartei, wu unter em Landeshauptmann Markus Wallner fascht 25 Brozäntpinkt vor dr zwaitblatzierte Griene gläägen isch.[3]